30-dan çox Avropa Parlamentinin deputatı Avropa İttifaqının xarici siyasət və təhlükəsizlik üzrə ali nümayəndəsi Cozef Borrelə Gürcüstanda baş verənlər və Rusiya qanunları ilə bağlı məktub yazır:“Hörmətli Ali Nümayəndə/Vitse Prezident,
Gürcüstan hakimiyyətinin davam edən qeyri-demokratik davranışı, xüsusən də onların xarici agentlər haqqında rus tipli qanun tətbiq etmək və dinc nümayişçilərə qarşı güc tətbiq etmək üçün aqressiv cəhdləri sərhədi keçib. Bu cür davranış Gürcüstan siyasətində və cəmiyyətində gərginliyi və qütbləşməni daha da artırıb, Gürcüstan hökumətinin ölkəyə Aİ-yə namizəd statusu verilərkən atacağı 9 addımla ziddiyyət təşkil edir. Mən sizi qəti mövqe tutmağa və Gürcüstan hakimiyyətinə aydın siqnal verəcək aşağıdakı tədbirləri görməyə çağırıram.
Əvvəla, Gürcüstan hökumətinin və aparıcı partiya olan “Gürcü arzusu”nun davranışı Aİ-yə namizəd ölkənin öhdəliklərinə ziddir. Ona görə də Gürcüstanın namizəd statusu üzvlük prosesində gələcək irəliləyiş əldə olunana qədər dayandırılmalıdır.
İkincisi, Gürcüstanın dövlət büdcəsinin və hökumət proqramlarının Avropa İttifaqı tərəfindən maliyyələşdirilməsinə yenidən baxılmalıdır.
Üçüncüsü, Komissiyanın 8 noyabr 2023-cü il tarixli tövsiyəsində əksini tapmış doqquz addımın həyata keçirilməsində Gürcüstanın irəliləyişinin ortamüddətli qiymətləndirilməsi təxirə salınmadan həyata keçirilməlidir. Bu tədbir Gürcüstanda xarici agentlər haqqında qanunun yenidən tətbiqi cəhdləri və vətəndaş cəmiyyətinə məhdudiyyətlər haqqında parlamentin 25 aprel 2024-cü il tarixli qərarında yer alıb.
Biz son illər gürcü xalqını və onun Avropa İttifaqına üzv olmaq istəklərini dəstəkləmək üçün yorulmadan çalışmışıq. Biz hələ də bu yolu qətiyyətlə davam etdiririk, lakin demokratik meyarlar bütün Aİ-yə namizəd ölkələr üçün eynidir və onlara hörmət edilməlidir”, – deyə birgə məktubda bildirilir.
