Human Rights Watch (HRW) insan haqları təşkilatı öz hesabatında bildirir ki, Gürcüstanda xarici agentlər haqqında qanunun əleyhdarlarına – siyasətçilərə və vətəndaş fəallarına qarşı zorakılıqla bağlı araşdırma səmərəsiz aparılır.
Sənəddə deyilir ki, Gürcüstan hakimiyyəti “vətəndaş və siyasi fəallara qarşı bir sıra zorakı hücumlarla bağlı effektiv araşdırma apardıqlarını nümayiş etdirə bilməyib”. Təşkilat hesab edir ki, cəzasızlıq 2024-cü ilin oktyabrında ölkədə keçiriləcək parlament seçkiləri ərəfəsində daha çox siyasi zorakılığa və qeyri-sabitliyə səbəb ola bilər.
QHT aprel ayından iyun ayına qədər naməlum şəxslərin ondan çox fəala hücum etdiyini və onların baş və bədən xəsarətləri aldıqlarını bildirir. Lakin indiyədək heç kim həbs edilməyib, bu isə o deməkdir ki, bu, hakimiyyətin maraqlarına uyğun deyil.
“Hücumların əksəriyyəti şahidlərin və yaxınlıqda müşahidə kameralarının olduğu ictimai yerlərdə kiçik qruplar tərəfindən həyata keçirilib. Polis əksər hallarda rəsmi olaraq istintaqa başlasa da, heç bir şübhəli şəxsi müəyyən etməyib və ya həbs etməyib və onların təqsirkarların məsuliyyətə cəlb edilməsi üçün lazımi istintaq tədbirləri görmədiyinə dair narahatedici əlamətlər var”, – insan haqları qrupu hesabatda bildirib.
“Gürcüstan hakimiyyəti zorakı hücumları dərhal, hərtərəfli və effektiv şəkildə araşdırmalı, günahkarları ədalət qarşısında cavablandırmalı və siyasi motivli zorakılığı açıq və birmənalı şəkildə pisləməlidir. Hökumət tənqidçilərinə edilən hücumlara görə cəzasızlıq açıq mesaj verir ki, hakimiyyət onların maraqlarına xidmət edir və siyasi motivli zorakılığa göz yumur.
Səlahiyyətlilər fərdi təcavüzkarları müəyyən edə bilən sürətli, hərtərəfli və effektiv araşdırmalar aparmaqla belə bir siqnalın qarşısını ala bilər” deyə təşkilatın Avropa və Mərkəzi Asiya üzrə direktoru Hyu Villiamson bildirib.
