ABŞ Prezidenti Donald Trampın Ukrayna və Rusiya üzrə xüsusi nümayəndəsi çərşənbə günü bildirib ki, Birləşmiş Ştatlar Ukrayna üçün təhlükəsizlik zəmanətlərinin vacibliyini anlayır. O, bu bəyanatı Ukrayna rəsmiləri ilə danışıqlar aparmaq üçün ölkəyə səfəri zamanı verib.General Kit Kelloq jurnalistlərə Kyivdə olduğunu və Ukrayna rəhbərliyinin narahatlıqlarını dinləyərək Birləşmiş Ştatlara qayıdıb Prezident Trampa məruzə edəcəyini bildirib.Kelloq ABŞ-ın Ukraynadakı müharibənin sona çatmasını istədiyini, bunun region və dünya üçün faydalı olacağını vurğulayıb.
Kelloq ABŞ-ın Ukraynadakı müharibənin sona çatmasını istədiyini, bunun region və dünya üçün faydalı olacağını vurğulayıb.Ukrayna Prezidenti Volodimir Zelenski jurnalistlərə Kelloq ilə gözlənilən görüşü ərəfəsində bildirib ki, ABŞ rəsmiləri mümkün müharibə sonrası sülhməramlı missiyanın bir hissəsi kimi ABŞ qoşunlarının yerləşdirilməyəcəyini desələr də, hələ də kömək edə biləcəkləri başqa yollar var, məsələn, hava hücumundan müdafiə sistemləri təmin etməklə.
“Siz yerə qoşun göndərmək istəmirsiniz, NATO-nu istəmirsiniz? Yaxşı, bəs bizə ‘Patriot’ verə bilərsiniz?” – deyə Zelenski bildirib
Danışıqlar Rusiyanın Ukraynaya qarşı apardığı müharibə ilə bağlı diplomatik səylərin gücləndiyi bir vaxtda baş tutub. Fransa prezidenti Emmanuel Makron çərşənbə günü Avropa liderlərini Ukraynaya dəstək və münaqişənin həlli ilə bağlı ikinci raund müzakirələrə dəvət edib.
Kelloq bu həftənin əvvəlində Avropa liderləri ilə görüşüb. Çərşənbə axşamı isə ABŞ Dövlət katibi Marko Rubio Səudiyyə Ərəbistanında Rusiyanın Xarici İşlər naziri Sergey Lavrovla danışıqlar aparıb.
Rubio bildirib ki, sülhə nail olmaq üçün həm Ukrayna, həm də Rusiya güzəştlərə getməlidir.
“Məqsəd bu münaqişəni ədalətli, davamlı, dayanıqlı və bütün tərəflər üçün məqbul bir şəkildə başa çatdırmaqdır,” deyə Rubio jurnalistlərə bildirib. Lakin bu görüşdə nə Ukrayna, nə də Avropa rəsmiləri iştirak edib.
Ukrayna prezidenti Volodimir Zelenski görüşə dəvət olunmamasına etiraz edib. ABŞ Prezidenti Donald Tramp isə bu mövqeyə tənqidi yanaşıb.
“Bu gün eşitdim ki, ‘Biz dəvət olunmadıq’. Siz oradasınız, üç ildir ki, bu münaqişə davam edir,” deyə Tramp Ukrayna liderlərinə müraciət edib. “Siz buna heç vaxt başlamamalı idiniz.”
Rusiya 2022-ci ilin fevralında Ukraynaya qarşı tammiqyaslı müharibəyə başlayıb.
Floridadakı iqamətgahında jurnalistlərlə danışan Tramp müharibəni bitirmək üçün “yaxşı şansı” olduğunu düşündüyünü deyib. Lakin Zelenski Ukraynanın ABŞ və Rusiyanın diktə etdiyi sülh razılaşmasını qəbul etməyəcəyini bildirib.
Zelenski bu həftə Səudiyyə Ərəbistanına planlaşdırılan səfərini təxirə salıb. O, səfərinin Rusiya-ABŞ danışıqları ilə əlaqələndirilməsini istəmədiyini bildirib.
Dövlət Departamentinin sözçüsü Tammi Brüs verdiyi açıqlamada bildirib ki, ABŞ və Rusiya “Ukraynadakı münaqişənin mümkün qədər tez bitirilməsi üçün yüksək səviyyəli nümayəndə heyətləri təyin etməyə” razılaşıblar. Brüs görüşü “sülhə doğru vacib bir addım” kimi qiymətləndirib.
Rubio deyib ki, Ukrayna və Avropa dövlətləri müharibənin dayandırılması ilə bağlı danışıqlarda iştirak etməli olacaqlar. O əlavə edib ki, əgər müharibə dayandırılarsa, ABŞ-ın Rusiya ilə ticarət və digər qlobal məsələlər üzrə “misilsiz əməkdaşlıq imkanları” yaranacaq.
Avropa İttifaqının xarici siyasət rəhbəri Kaja Kallas isə ABŞ-Rusiya görüşündən sonra Rubio ilə danışdıqlarını bildirib və Ukraynanın rəhbərlik etdiyi bir həll yoluna dəstəyini ifadə edib.
“Rusiya bizi parçalamağa çalışacaq. Gəlin onların tələlərinə düşməyək”, deyə Kallas X sosial platformasında yazıb. “ABŞ ilə birgə çalışaraq Ukraynanın şərtləri əsasında ədalətli və davamlı sülhə nail ola bilərik.”
Hazırda Rusiya 2014-cü ildə beynəlxalq səviyyədə tanınmış Ukrayna ərazisinin beşdə birini nəzarətdə saxlayır. Buraya 2014-cü ildə birtərəfli qaydada ilhaq etdiyi Krım yarımadası, sonrakı illərdə separatçılar tərəfindən ələ keçirilən şərqi Ukraynanın böyük hissəsi və 2022-ci ildən sonra işğal etdiyi ərazilər daxildir.
İşğala başlayanda Moskva bütün Ukraynanın tezliklə ələ keçirilməsinə ümid edirdi. Lakin Ukraynanın sərt müqaviməti ilə müharibə, əksinə, uzunmüddətli quru döyüşlərinə və hər iki tərəfdən hər gün aparılan hava hücumlarına çevrildi.
Zelenski ölkəsinin 2014-cü il sərhədlərinin bərpasını tələb edir, lakin ABŞ rəsmiləri bunun real olmadığını və Ukraynanın NATO-ya qoşulma məqsədinin çətin olduğunu bildiriblər.
