Amerikanın sanksiyaları fonunda Kobaxidze Çinlə münasibətləri dərinləşdirir – “Gürcü Arzusu”nun baş naziri Çin Xalq Respublikasının Gürcüstandakı fövqəladə və səlahiyyətli səfiri Çou Tsien ilə görüşüb.
Görüşdə Kobaxidze bir daha Çində baş vermiş və çoxsaylı insan tələfatı ilə nəticələnən dağıdıcı zəlzələ ilə əlaqədar səfirə başsağlığı verib, xəsarət alanların tezliklə sağalmasını arzulayıb.
Söhbət zamanı Gürcüstan və Çin arasında strateji tərəfdaşlıq sazişinin təmin etdiyi sahələrdə əməkdaşlığa və ticarət-iqtisadi əlaqələrin inkişafının müsbət dinamikasına toxunulub.
Bildirilib ki, azad ticarət sazişi və vizasız gediş-gəliş, eləcə də insanlar arasında əlaqələr ikitərəfli münasibətlərin daha da inkişafı üçün yaxşı imkandır. Tərəflər nəticəyönümlü əməkdaşlığın daha da gücləndirilməsinə hazır olduqlarını təsdiq ediblər.
