Avropa Parlamenti Bidzina İvanişvili hökumətini de-fakto və özünü elan edən, onu tanımayan və Salome Zurabişvilini legitim prezident hesab edən qətnamə qəbul edib. Bundan əlavə, qətnamə İvanişvili rejimini siyasi məhbusları azad etməyə, etiraz aksiyalarında zorakılıq hallarını araşdırmağa və yeni seçkilərin keçirilməsinə çağırır.
Qətnamədə Avropa İttifaqına və onun üzv dövlətlərinə müraciət edilir ki, Bidzina İvanişviliyə və onun ətrafına, eləcə də Gürcüstanda demokratik tənəzzülə səbəb olan şəxslərə, həm hüquq-mühafizə orqanlarının əməkdaşlarına, həm də hakimlərə qarşı sanksiyalar tətbiq edilsin.
Qəbul edilmiş qətnamənin mətnində vurğulanır ki, 2024-cü il oktyabrın 26-da keçirilən seçkilərdən sonra Gürcüstanda demokratik geri çəkilmə “kəskin surətdə sürətlənib”. Burada o da qeyd olunur ki, parlament seçkiləri beynəlxalq demokratik standartlara və ATƏT-də Gürcüstanın ruhuna uyğun gəlməyib, “demokratik norma və ədalətli seçki standartları” pozulub, “nəticədə seçilmiş “Parlament” və müvafiq olaraq “Prezident” bütün demokratik legitimlikdən məhrum edilib”.
Qətnamədə Bidzina İvanişvilinin parlamenti “de-fakto parlament” adlandırılır. Həmçinin qeyd olunur ki, İrakli Kobaxidzenin 2024-cü il noyabrın 28-də Aİ-yə üzvlük danışıqlarını 2028-ci ilə qədər təxirə salmaq barədə açıqlaması ölkənin Avro-Atlantik istəklərini alt-üst edib.
Mətndə noyabrın 28-də başlayan etiraz aksiyalarının iştirakçılarına polisin qeyri-insani münasibəti, jurnalistlərə qarşı zorakılıq faktları təsvir olunub. Polis qüvvələrinin şəxsiyyət nişanlarının olmadığı vurğulanır. Söhbət həm də 2025-ci il yanvarın 14-də “Gürcü arzusu”nun nümayəndələrinin müxalifətçi Qiorqi Qaxariya və jurnalist Zviad Koridzeyə hücumundan gedir. Yanvarın 14-də müxalifətçilər Nika Melia və Qiqi Uqulavanın həbsi, eləcə də yanvarın 12-də Batumidə Elene Xoştariyanın həbsi faktları qeyd edilir.
Nümayişçilərə qarşı qeyri-mütənasib güc tətbiqi ilə yanaşı, “özünü təyin edən hakimiyyət orqanlarının yeni sərt qanunlar tətbiq etdiyi” vurğulanır.
544 deputatdan 400-ü qətnamənin qəbulunu dəstəkləyib, 63-ü əleyhinə çıxıb, 81-i səsvermədə iştirak etməyib.
