Azərbaycanlı jurnalist Əfqan Sadıqovun həyat yoldaşı Sevinc Sadıqova övladları və hüquq müdafiəçiləri ilə birlikdə Azərbaycanın Tbilisidəki səfirliyi qarşısında etiraz aksiyası keçirib. İsveçli ekoloq Qreta Tunberq də onlara qoşulub.
“Əliyev Əfqanın Azərbaycana verilməsini istəyir, qoy bütün dünya bunu başa düşsün. Əfqan çox xəstədir, acından ölür, hər an komaya düşə bilər, həkimlər belə deyir,” – jurnalistin həyat yoldaşı Sevinc Sadıqova bildirib.
Əfqan Sadıqovun ona beynəlxalq müdafiə statusunun verilməsindən imtina ilə bağlı işinə Tbilisi Şəhər Məhkəməsində baxılır.
Azərbaycanın Azel.Tv media nəşrinin baş redaktoru Əfqan Sadıqov avqustun 3-də Tbilisidə həbs edilib. O, 2023-cü ilin dekabrında Gürcüstana gəlib və həbsindən iki həftə əvvəl ölkəni tərk etmək niyyətində idi, lakin hava limanında buna icazə verilməyib.
Noyabrın 1-də Tbilisi Şəhər Məhkəməsi Əfqan Sadıqovun ekstradisiyasına dair həbs müddətini üç ay uzadıb.
