Avqustun 19-da ABŞ dövlət katibi Entoni Blinken İsrailə gələrək bu ölkənin prezidenti və baş naziri ilə görüşlər keçirib. Səfərin məqsədi Qəzzada davam edən müharibə ilə bağlı atəşkəs razılaşmasının yekun detallarını razılaşdırmaqdır.
Dünən İsrailin baş naziri Benyamin Netanyahu ABŞ-ın təklif etdiyi sülh sazişini dəstəklədiyini bildirib. Netanyahu ABŞ dövlət katibi Entoni Blinkenlə görüşü müsbət qiymətləndirib.
Entoni Blinken də bu gün eyni şeyi təsdiqləyib və bir daha HƏMAS-ı razılaşmanı dəstəkləməyə çağırıb.
“İndi bunu HƏMAS da etməlidir, daha sonra tərəflər vasitəçilərin köməyi ilə: ABŞ, Misir və Qətər bu prosesi başa çatdırmalı və bu sənəd üzrə öhdəliklərini necə yerinə yetirəcəklərini razılaşdırmalıdırlar”, – Blinken bildirib.
Hələlik Həmas bu təklifdən imtina edib. Bununla belə, avqustun 15-də Dohada keçirilən danışıqlarda Həmas nümayəndələri ABŞ və İsrail olmadan, müstəqil şəkildə Misir və Qətər vasitəçiləri ilə görüşərək atəşkəsi müzakirə ediblər.
