Praqadan təxminən 100 kilometr şərqdə yerləşən Çexiyanın Hradec Kralove şəhərində ticarət mərkəzində bıçaqlı hücum nəticəsində iki qadın həlak olub.
Polisin məlumatına görə, şübhəli şəxs yerindəcə həbs edilib.
Əvvəlcə polis hücum zamanı iki qadının yaralandığını, onlardan birinin vəziyyətinin ağır olduğunu bildirsə də, sonradan hər iki qadının öldüyü təsdiqlənib.
Ölənlərin adları açıqlanmayıb.
Polisin məlumatına görə, şübhəli şəxs 16 yaşlı Çexiya vətəndaşıdır. O, hücumdan təxminən 10 dəqiqə sonra hadisə yerindən 1 kilometr aralıda hüquq-mühafizə orqanlarının əməkdaşları tərəfindən həbs edilib. Polis həmçinin cinayət yerinin yaxınlığında qatilin iki qadını ölümcül yaraladığı bıçağı tapıb.
Polisin məlumatına görə, artıq ictimaiyyət üçün heç bir təhlükə yoxdur. Bu mərhələdə əlavə təfərrüatlar məlum deyil.
