Qətər ABŞ-ın tələbini yerinə yetirəcək və Fələstinin HƏMAS qruplaşmasının liderlərini yaxın həftələrdə ölkədən çıxaracaq – məlumatı CNN yayıb.
Həmas-İsrail müharibəsini dayandırmaq üçün 2 həftə əvvəl ABŞ rəsmiləri Qətərli həmkarlarına paytaxt Dohada Həmas liderlərinə sığınacaq verməyi dayandırmalı olduqlarını bildiriblər. CNN-in anonim mənbələrə əsaslanaraq yazdığına görə, Qətər bu təkliflə razılaşıb və 1 həftə əvvəl HƏMAS-a bu barədə xəbərdarlıq edib.
“Həmas amerikalıları öldürən terror qruplaşmasıdır və amerikalı girovlar hələ də əsir saxlanılır. Girovların azad edilməsi ilə bağlı çoxsaylı təklifləri rədd etdikdən sonra HƏMAS liderlərinə artıq ABŞ-ın tərəfdaş ölkənin paytaxtında yaşamağa icazə verilməməlidir”. – anonim amerikalı yüksək vəzifəli məmur bildirib.
HƏMAS liderlərindən biri cavab olaraq bildirib ki, Qətərin HƏMAS-ın yüksək rütbəli məmurlarını ölkədən qovmağa razı olması barədə xəbərlər “əsassız” və ABŞ-ın “təzyiq taktikası”dır.
“İsrail mediasının ABŞ-ın tələbi ilə Qətər tərəfindən Həmas üzvlərini Dohadan qovması ilə bağlı yayılan məlumatlar əsassız və sadə təzyiq taktikasıdır. Belə xəbərlər dəfələrlə sübut olmadan yayılıb”. – HƏMAS-ın yüksək rütbəli rəsmisi CNN-ə bildirib.
