Hazırda həbsdə olan Dövlət Təhlükəsizlik Xidmətinin keçmiş yüksək vəzifəli məmuru Soso Qoqaşvili həbsxanadan universitetə daxil olub və 100% qrant alıb.
Neytral.ge xəbər verir ki, bu barədə məlumatı saxlanılan şəxsin qızı Nini Qoqaşvili yayıb.
Onun sözlərinə görə, Qoqaşvili İvane Cavaxişvili adına Tbilisi Dövlət Universitetinin Hüquq fakültəsinə qəbul olub:
“Atam müəllimsiz, bizim göndərdiyimiz imtahan kitabçalarının köməyi ilə həbsxanada oxuyurdu. Qarşısına məqsəd qoydu, çox çalışdı və məqsədinə çatdı! Atam məktəbdə əlaçı şagird olub, sonra magistr dərəcəsi ilə iqtisadçı, sonra beynəlxalq münasibətlər üzrə doktor, polkovnik-leytenant olub, indi də yeni nəsə öyrənmək mərhələsindədir.
Özünüzü ədalətsiz bir reallıqda tapsanız və “insanlar” sizi və ailənizi məhv etməyə çalışsa belə, siz həmişə güc tapmalı, heç vaxt dayanmamalı və Allaha ümidinizi itirməməlisiniz. Biz bu gücü birlikdə tapmağa çalışırıq”, – Qoqaşvilinin qızı Facebook-da yazıb.
Qeyd edək ki, Təhlükəsizlik Xidməti rəhbərinin keçmiş müavini Soso Qoqaşvili 2022-ci il iyulun 16-da evində həbs edilib. İstintaq onu qəsdən dövlət sirrini yaymaqda, vəzifə səlahiyyətlərini aşmaqda, şəxsi məlumatları qanunsuz əldə etmək və saxlamaqda, qanunsuz olaraq odlu silah saxlamaqda ittiham edib. Məhkəmənin hökmü ilə o, 5 il müddətinə azadlıqdan məhrum edilib.
Qoqaşvili özünü siyasi məhbus hesab edir.
