Batumidə fiziki zorakılığa məruz qalan Gürcüstanın keçmiş baş naziri, keçmiş daxili işlər naziri, müxalif “Gürcüstan naminə” partiyasının lideri Qiorqi Qaxariyanın burnu sınıb və beyin silkələnib. Bunu jurnalistlərə Qaxariyanın tibbi müayinədən keçdiyi Batumi klinikasında həkim Tako Şantadze deyib. Həkimin sözlərinə görə, Qaxariya öz istəyi ilə klinikanı tərk edib.
“Batumi Şeraton” otelində Qiorqi Qaxariyanın “Gürcü arzusu”nun nümayəndələri Dimitri Samxaradze, Qiorqi Manvelidze və başqaları tərəfindən hücuma məruz qalması barədə ilk xəbəri yanvarın 15-də gecə yarısından sonra “Mtis Ambebi” nəşrinin redaktoru Qela Mtivlişvili “Facebook”da yayıb.
“Gürcüstan Naminə” partiyasının liderlərindən biri, daxili işlər nazirinin sabiq müavini və prokurorluğun keçmiş yüksək vəzifəli məmuru Natia Mezvrişvili dünən axşam “Facebook”da yazıb ki, “Şeraton mühafizəsi artıq gizlədilib. Onlar sübutları məhv etməyə başladılar”.
Natia Mezvrişvili Bidzina İvanişvilini Qiorqi Qaxariyaya hücuma görə şəxsən məsuliyyət daşıdığını bildirib.
