Reuters-in məlumatına görə, Rusiya və ABŞ nümayəndələri yaxın bir neçə gün ərzində Səudiyyə Ərəbistanında Rusiya-Ukrayna müharibəsinin başa çatması ilə bağlı görüş keçirəcəklər. Amerikalı konqresmen Maykl Makkal Reuters agentliyinə məlumatı təsdiqləyib.
Dövlət Departamenti hələlik məsələyə münasibət bildirməyib.
Ukrayna prezidentinin müşaviri Myxailo Podolyak Ukrayna mətbuatına bildirib ki, Ukrayna Səudiyyə Ərəbistanında planlaşdırılan görüşdə iştirak etmir.
“Danışıqlar masasında müzakirəyə dəyər heç nə yoxdur. […] Rusiya danışıqlara hazır deyil”, – Podolyak deyib.
ABŞ dövlət katibi Marko Rubio, milli təhlükəsizlik müşaviri Mayk Vals və Ağ Evin Yaxın Şərq üzrə nümayəndəsi Stiv Uitkoff Səudiyyə Ərəbistanına səfər edəcək. Hazırda Rusiya tərəfini kimin təmsil edəcəyi məlum deyil.
