Rusiyanın keçmiş baş naziri (2000-2004) “Azadlıq” radiosuna deyib ki, “Putin Gürcüstanın Avropa İttifaqı ilə başladığı oyundan razıdır”. 2022-ci ilin fevralından Mixail Kasyanov Qərbdə yaşayır, Putinin sərt tənqidçisi Kreml tərəfindən “xarici agent” statusu alıb. Vaja Tavberidzeyə müsahibəsində o, Gürcüstanda keçirilən seçkilər, Putinlə İvanişvili arasında mümkün sövdələşmə, 2008-ci il müharibəsi və “Putinsiz” Rusiyadan danışır.
İvanişvili Rusiyanı tərk etməzdən əvvəl Putinə nə vəd edib?
Kasyanov: Bəli, bu qələbədir. Amma kiçik qələbə, çünki əsl, böyük qələbə Ukrayna olacaqdı. Amma aydındır ki, Putin bu seçkilərin nəticələrindən həm razıdır, həm də sevinir. Cənab İvanişvilinin Putinə nə vəd etdiyini, nə ilə razılaşdığını, hətta Rusiyadan çıxıb orada qazanılan pulları necə çıxardığını da bilmirəm. Bu bir faktdır ki, o, sonradan baş nazir təyin edildi və tədricən Gürcüstanı Putin rejiminə sadiq bir ölkəyə çevirdi. Daha nə söz verdi, bu sövdələşmə nə qədər davam edəcək, hələ bilmirik.
AzadlıqRadiosu: Mən sizdən seçkiqabağı dövrdə hakimiyyətin seçdiyi hədə-qorxu taktikası barədə soruşmaq istərdim. Tezis kifayət qədər sadədir: “Bizi seçməsən, müharibə olacaq”. Ya Qərb bizi müharibəyə sürükləyəcək, ya da bizim əvəzimizə başqa hakimiyyət olsa, Rusiya bunu qəbul etməyəcək və Gürcüstana hücum edəcək. Bu nə dərəcədə realdır? Rusiya bunda nə dərəcədə maraqlıdır və Ukraynadakı müharibə fonunda yeni müharibəyə başlamaq həvəsi varmı?
Kasyanov: Düşünürəm ki, hakim partiya bu şüarı ona görə seçib ki, ondan istifadə edib Ukrayna müharibəsi fonunda insanları qorxutsun, onların hissləri ilə oynasın – müharibə, təbii ki, heç kim istəmir, hətta təsəvvür etmək belə hər kəsin ürəyini parçalayır. Amma Rusiya və Putinə gəlincə, bu, onların maraqlarına nə dərəcədə uyğundur – çox aydındır ki, Putin Gürcüstanı NATO-da görmək istəmir və o, Gürcüstanın Aİ ilə başladığı oyundan məmnundur – onlar birmənalı cavab aldılar, vizasız rejim, digər imtiyazlar və hətta üzvlüklə bağlı danışıqlar başladı, amma bütün bunlar oyun qaydaları çərçivəsində baş verir: guya müstəqillik, amma Putini alçaltacaq və təhlükə yaradacaq şəkildə deyil.
