Dekabrın 6-na olan məlumata görə, səkkiz gün davam edən Avropayönlü aksiyalar zamanı 338 nəfər inzibati xətalara görə həbs edilib.
Onlardan 5-ni dekabrın 6-na keçən gecə həbs ediblər.
Bu barədə Azadlıq Radiosuna Daxili İşlər Nazirliyi məlumat verir.
Saxlanılan şəxslər İnzibati Xətalar Məcəlləsinin 173 və 166-cı maddələri ilə polisin qanuni tələbinə tabe olmamaq və xırda xuliqanlıq kimi maddələrlə ittiham olunurlar.
Tbilisi Şəhər Məhkəməsində məhbusların məhkəməsi davam edir. Hakimlər saxlanılanların bəzilərinə inzibati cərimə, bəzilərinə isə inzibati həbs tətbiq edir.
Saxlanılanların əksəriyyəti xüsusi təyinatlılar tərəfindən fiziki təzyiqə məruz qaldıqlarını deyir. Onlardan bəzilərinin klinikaya köçürülməsinə ehtiyac yaranıb. Onların həm üzlərində, həm də bədənlərinin müxtəlif yerlərində ağır xəsarətlər olduğu görünür.
Elə hallar olur ki, məhbuslar məhkəmə iclaslarına qanlı paltarla gedirlər.
Xüsusi İstintaq Xidməti bildirir ki, noyabr-dekabr ayları ərzində keçirilən tədbirlər zamanı hüquq-mühafizə orqanları əməkdaşlarının vəzifə səlahiyyətlərindən sui-istifadə etmələri, jurnalistlərin peşə fəaliyyətinə qanunsuz müdaxilələri ilə bağlı 319 ərizə daxil olub.
