Ukrayna Futbol Federasiyasının prezidenti Andriy Şevçenkonun sözlərinə görə, o, Kaxa Kaladze ilə münasibətini kəsib və o, artıq onun üçün yoxdur. Şevçenko bu barədə “Tribuna” idman nəşrinə danışıb.
Tbilisi meri Kaxa Kaladzenin fəaliyyətini necə qiymətləndirirsiniz sualına Şevçenko belə cavab verib: “Mən Kaladze ilə əlaqə saxlamıram. Mən prezidentimizi dəstəkləyirəm, Kaladze artıq mənim üçün yoxdur”.
2024-cü ilin dekabrında Ukrayna prezidenti Vladimir Zelenski İvanişvili rejiminə qarşı sanksiyaların tətbiqi haqqında fərman imzalayıb.
Ukrayna İvanişviliyə və onun müttəfiqlərinə, İrakli Kobaxidze və Kaxa Kaladze də daxil olmaqla 19 nəfərə qarşı sanksiyalar tətbiq edib.
Kaxa Kaladze və Andriy Şevçenko futbol karyeraları ərzində illər boyu komanda yoldaşı olublar – 1998-1999-cu illərdə Kiyev “Dinamo”sunun tərkibində, 2001-2006 və 2008-ci illərdə isə “Milan”ın tərkibində. 2013-cü ildə Şevçenko Kaladzenin Tiflisdəki vida oyununda da meydana çıxıb.
