Böyük Britaniyanın baş naziri Keir Starmer ABŞ prezidenti Donald Trampa plan təqdim edəcək və bu plana əsasən, Vaşinqtonun vasitəçiliyi ilə Ukraynada atəşkəs razılaşması əldə olunarsa, Avropa onun qorunmasını təmin etmək üçün Ukraynaya 30 minə qədər hərbçi göndərəcək.
Bu barədə Britaniyanın “Teleqraf” nəşri məlumatlı mənbələrə istinadən yazır.
Böyük Britaniyanın baş naziri Keir Starmer və Fransa prezidenti Emmanuel Makron gələn həftə Vaşinqtona səfər etməyi planlaşdırır.
Teleqraf mənbələrinin məlumatına görə, Starmer Rusiyanın atəşkəs şərtlərini pozacağı təqdirdə Şərqi Avropada yerləşdirilən ABŞ qırıcı və raketlərinin hazır vəziyyətə gətirilməsini tələb edəcək.
Britaniya nəşrinin yazdığına görə, təhlükəsizlik qüvvələrinin yaradılması ilə bağlı Britaniya-Fransa planı bu həftə Parisdə keçirilən Avropa liderlərinin fövqəladə sammitində təqdim edilib. Sammitin çağırılmasından əvvəl ABŞ prezidenti Donald Trampın Ukraynada müharibəyə son qoymaq üçün Rusiya ilə danışıqlara başlamaq qərarı verilib.
Paris sammiti ABŞ və Rusiya nümayəndə heyətlərinin fevralın 18-də Səudiyyə Ərəbistanında baş tutan görüşündən bir gün əvvəl idi.
Paris sammiti öncəsi baş nazir Keir Starmer fevralın 16-da bildirib ki, Böyük Britaniya sülh sazişinin icrası üçün lazım gələrsə, Ukraynaya qoşun göndərməyə hazırdır.
Bəzi Aİ ölkələri, o cümlədən Almaniya, İtaliya və İspaniya öz sülhməramlı qüvvələrini Ukraynaya göndərməkdən çəkinirlər.
